Michael Doyle, zëdhënës i Dhomave të Specializuara të Kosovës (DhSK) në Hagë, përmes platformës online “Zoom”, ka thënë se trupi gjykues në rastin e Hysni Gucatit dhe Nasim Haradinajt, do të nxjerrë aktgjykimin në kohën e duhur në përputhje me kornizën ligjore të gjykatës.

Gjatë konferencës për medie të mbajtur të enjten, Doyle ka dhënë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë, raporton “Betimi për Drejtësi”.

“Një nga arritjet e tjera domethënëse të DHSK-së, ishte mbyllja e gjykimit të z. Hysni Gucati dhe z. Nasim Haradinaj të enjten e shkuar, me deklaratat përmbyllëse të palëve dhe deklaratat e z. Gucati dhe z. Haradinaj. Trupi Gjykues do të nxjerrë aktgjykimin në kohën e duhur në përputhje me kornizën ligjore të DHSK-së”, është thënë nga ai.

Ai bëri të ditur se në çështjen Salih Mustafa, janë mbajtur katër seanca gjyqësore gjatë gjithë kësaj jave.

“Ditën e hënë, mbrojtësja e viktimave i bëri parashtrime gjykatës në emër të viktimave të pranuara si pjesëmarrëse në proces dhe një prej viktimave shprehu mendimet dhe shqetësimet e veta para Trupit Gjykues. Ditën e martë, mbrojtësi i z. Mustafa bëri deklaratën e vet hyrëse në të cilën parashtronte arsyet pse, sipas Mbrojtjes, z. Mustafa duhet të lirohet nga akuzat e ngritura kundër tij”, ka thënë ai.

Sipas tij, ditën e djeshme dhe të sotme, mbrojtja në kuadër të paraqitjes së provave të veta, thirri dëshmitarin e parë.

“Dëshmitarit i drejtoi fillimisht pyetje Mbrojtja dhe më pas Zyra e Prokurorit të Specializuar. Dëshmitarit i bëri pyetje edhe mbrojtësja e viktimave.Mbrojtja do të vijojë me paraqitjen e provave javën e ardhshme, midis datave 28 dhe 31 mars”, ka bërë të ditur ai.

Sipas tij, më 21 mars, trupi gjykues nxori vendimin e nëntë të rishikimit të paraburgimit të Mustafës dhe urdhëroi vazhdimin e mbajtjes së tij në paraburgim.

Ai ka thënë se gjykatësit konstatuan se asnjë prej kushteve, përfshirë kushtet e propozuara nga mbrojtja, nuk e ulin mjaftueshëm rrezikun e pengimit nga Mustafa të ecurisë së procesit përmes ndërhyrjes ndaj viktimave dhe dëshmitarëve, dhe/ose familjeve e tyre.

“Javën e shkuar, më 18 mars, Trupi Gjykues në çështjen Mustafa urdhëroi palët, mbrojtësen e viktimave dhe Administratoren të rishikojnë disa prej transkripteve dhe të dorëzojnë parashtrime nëse mund të hiqen disa nga redaktimet ekzistuese dhe/ose transkriptet të riklasifikohen si publike”, ka bërë të ditur ai.

Sipas Doyle, më 22 mars, Paneli i Gjykatës së Apelit në çështjen Hashim Thaçi dhe të tjerët hodhi poshtë apelet e Thaçit dhe Veselit kundër vendimit të Gjykatësit të Procedurës Paraprake të 23 dhjetorit 2021.

Tutje, ka thënë se në vendimin në fjalë, gjykatësi i procedurës paraprake miratoi pjesërisht leje për ZPS-në që të ndryshojë aktakuzën në këtë çështje.

“Seanca vijuese e procedurës paraprake në këtë çështje është planifikuar të mbahet sot pasdite në orën 14:30. Seanca do të transmetohet më 45 minuta vonesë në faqen e internetit të Dhomave të Specializuara të Kosovës, në të tria gjuhët zyrtare të gjykatës”, ka bërë të ditur Doyle.

Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë.